مراجعة انمي monster مترجم حصريا

 مراجعتي البسيطة لانمي مونستر📝:

(🔴المراجعة فيها حرية حرق لجميع الأحداث بالتفاصيل والثريد هيكون طويل فاللي ناوي يقراه يجيب قهوته ويستعد🔴)

احترت جدًا ازاي ابدأ الثريد ده وايه الطريقة اللي همشي بيها، ومقدرتش اوصل لحاجة أفضل من اني في البداية اتكلم عن بداية العمل نفسها واللي هي أحد أكبر النقاط الإيجابية فيه، وتحديدًا أقصد أول اربع حلقات من العمل.. فعلًا من أقوى البدايات اللي شفتها لأسباب كثير..

فكرة الانمي نفسها جميلة، جراح ينقذ طفل من إصابة حرجة، ثم يكتشف بعدين انه في الحقيقة أنقذ مجرم، وحش تسبب بموت ناس كثير، وأحس بالمسؤولية وانه السبب في موتهم بشكلٍ ما، فيقرر يسيب كل حاجة ورا ظهره ويروح يصلح غلطته، فكرة مش الأكثر عبقرية في العالم لكنها بسيطة وجميلة وكفيلة تشدني للعمل

ثم بعد ده ييجي التقديم، تقديم شخصية تيما والضغوطات اللي بيتعرضلها وطريقة تفكيره، تقديم الشخصيات وعالم الطب اللي حواليه، تقديم القصة نفسها والغموض اللي بيحيط بيها، احنا فجأة بدأنا بجريمة قتل وطفلين واحد على حافة الموت والثانية حصلها صدمة عقلية وقاعدة تقول "اقتله" +..

والموضوع بالكامل غريب وبعدين فجأة المدير والطبيبين اللي كانوا معاه ماتوا بحلوى مسممة والطفلين اختفوا وبعدها بعشر سنوات شفنا يوهان الفتى اللي تيما أنقذه بعد ما بقى قاتل بدم بارد وشفنا "ينكرس" وقصته مع يوهان، وكذلك شفنا في الفترة دي تقديم لونغي وإصراره على اتهام تيما..

من الآخر يعني كل العوامل اللي ممكن تجذبك للقصة وتخليك مشدود وعايز تعرف اللي هيحصل، سواء بسبب التقديم الرائع للحبكة والغموض أو التقديم الجميل أيضًا للبطل ودوافعه وهدفه، وتقديم رائع كذلك لشخصيات لونغي وايفا ويوهان.. وبم اننا جبنا سيرة البطل ودوافعه فخليني هنا اتكلم عن تيما شوية..

بصراحة أكثر شخصية مستغرب من كره الناس لها! حتى فانز مونستر نفسهم كثير منهم مبيحبش تيما وانا اختلف بصراحة.. تيما شخصية جيدة جدًا، هو يمكن معندوش حاجة مميزة أو واو في شخصيته لكن ده شيء فريد في حد ذاته ومطلوب في القصة دي تيما انسان طيب ونقدر نقول "حساس" كمان، اكتشف فجأة انه كان مسؤول عن إنقاذ وإيقاظ "وحش" تسبب في موت ناس بالهبل وما زال مستمر، والمسؤولية دي هي بوصلته طول الأحداث، هو معتبر نفسه السبب في سلسلة الموت اللي حصلت دي ومهمته انه يوقفها زي ما بدأها.. شفت كلام كثير عن انه شخصية "غير واقعية" و "طيب زيادة عن اللزوم"، بس فعليًا أنا مش شايف ده إطلاقًا.. هو عمركوا ما شفتوا شخصية طيبة في الحقيقة؟ أنا من أكثر الناس اللي بيحبوا الشخصيات تكون رمادية وبدون صح مطلق وطيبة مطلقة، لكن ده مش معناه إن عشان الشخص بطبيعته خيّر يبقى غير واقعي.. ثم مين قال انه تيما متسامح وطيب 100%؟ شفنا ايفا لما ابوها مات وراحت تسترجاه يرجعلها لكنه مقدرش يسامحها.. تيما بطل مناسب جدًا للعمل والتناقض بين شخصيته والعالم الاجرامي اللي هو دخل فيه، التناقض ده بيساعد في إيصال مدى بشاعة وقسوة العالم والشخصيات دي لنا بشكل أكبر..

عدم تقديم خلفية أو فلاش باك لتيما ممكن أزعج البعض، أنا عن نفسي مكنش عندي مشاكل إطلاقًا مع ده في البداية، لاننا بكل بساطة مش محتاجينه احنا خدنا البناء اللي محتاجينه لشخصية تيما في اول اربع حلقات بالفعل، وان كان حصل مشكلة بسيطة بسبب قرار غير موفق بعد كده في الحلقة بتاعت المكتبة +.. لما قرروا انهم يستعرضوا جزء بسيط من ماضي تيما وهو طفل ومعاناته، وده أزعجني بصراحة، مبحبش القرارات المايعة دي، يا اما تجيبلي ماضيه كامل وتفهمني المغزى بالظبط اللي انت عايز توصله من الماضي ده، يا اما زي ما عملت في الاول متجيبوش خالص ونكتفي باللي ظهر في الوقت الحاضر

المشهد مشفتش منه أي هدف بصراحة وحسيته عشوائي، يعني انت ليه حطيت المشهد ده هنا دلوقتي، أنا استفدت منه ايه؟ وليه مكملتش عليه بعد كده؟ كانت إضافة بدون داعي ارجع ثاني هنا للاحداث اللي تراجعت بشكل كبير للأسف بعد اول اربع حلقات، الإيقاع بقى بطيء اوي لفترة طويلة، ولغاية الحلقة 25 تقريبًا كان فيها مشاكل كثير، مش متذكر كل تفاصيلهم لاني شايفهم من فترة بس  فيه مشاكل رئيسية قللت متعتهم.. أولًا القصص الجانبية، كانت كثيرة جدًا وأغلبها ممل مع الأسف، مش هنكر إن يمكن بعضها كان جيد وفيه فكرة حلوة او فلسفة جميلة تضيف للجو العام للعمل، بس في العموم نسينا القصة الرئيسية ودخلنا في تمطيط طويل ووصلتني لخمول لدرجة خلاني اوقف متابعة العمل لفترة!

المشكلة ان أغلب القصص دي عادية جدًا، الفكرة الفلسفية اللي وراها مستهلكة، او الأحداث متوقعة او غير منطقية، ولاحظوا اننا بنتكلم عن عمل غموض، فآخر صفتين دول بالذات "متوقعة وغير منطقية" يعتبروا كارثة، وهتكلم عن النقطتين دول بتفصيل أكبر بعد شوية.. كثرة القصص الجانبية وكثافتها كذلك ظلمت القصص دي نفسها وكذلك قصص أخرى مهمة! كل قصة منهم مش واخدة حقها في بناء حبكتها ولا شخصياتها، وبالتالي ارتباطي بيها شبه منعدم، وبالتالي حاسس بملل وانا بتفرج عليهم.. خليني اجيب مثال هنا: الشخصية دي، الصحفي ماولر كان شخصية جانبية لكنه كان موجود في حدث مهم للقصة الرئيسية وهو مقتل عائلة نينا، وفاته مع عائلة فورتنر كانت المفروض تكون محزنة، لكني محستش بده إطلاقًا، أولًا لان كان واضح جدًا من بداية ظهوره إن الشخصية موجودة عشان تموت ونزعل عليها "سيناريو متوقع"

وثانيًا لان الشخصية مجتلهاش الفرصة تتبني كويس وارتبط بيها أصلًا! ومش شخصية ماولر بس فيه شخصيات كثير جم وراحوا بدون ما ارتبط بيهم على الإطلاق ولا بقصصهم، لانهم مش مبني لهم كويس ومش واخدين وقتهم بسبب إن المؤلف مصّر إنه يحشر أكبر عدد ممكن من القصص الجانبية في عمل واحد!

بالنسبة للسيناريوهات المتوقعة، سيناريو ماولر اللي قلته فوق، وسيناريو الظابطين اللي راحوا لموقع الحادث وكان واضح جدًا انهم رايحين يخطفوهم او يخلصوا منهم، الشخص ده اللي قال لتيما معلومات معينة وبعدين طخ نفسه زي ما كان واضح من البداية، وغيرها كثير من السيناريوهات المستهلكة المعروفة